કુદરતી સૌંદર્યથી ભરપૂર ડાંગ જિલ્લાના દક્ષિણ વનવિભાગના જંગલોમાં ફરી એકવાર આગ લાગવાની ઘટના સામે આવી છે. ડાંગના સામગહાન ફોરેસ્ટ રેન્જ હેઠળ આવતા ધુમખલ અને વઘઇ રેન્જના દેવીપાડાના જંગલોમાં ભીષણ આગ ફાટી નીકળી છે. ઉનાળાની શરૂઆત સાથે જ જંગલોમાં સૂકા પાંદડા અને ઘાસને કારણે આગે વિકરાળ સ્વરૂપ ધારણ કર્યું છે, જેના ધુમાડાના ગોટેગોટા દૂર-દૂર સુધી જોવા મળી રહ્યા છે.
વનસંપત્તિ અને જીવસૃષ્ટિને વ્યાપક નુકસાન
જંગલમાં લાગેલી આ આગને કારણે અમૂલ્ય વનસંપત્તિ બળીને ખાખ થઈ ગઈ છે. જંગલમાં વસતા પક્ષીઓના માળાઓ અને નાના વન્યજીવોના અસ્તિત્વ સામે પણ જોખમ ઊભું થયું છે. આગની આ ઘટનાથી પર્યાવરણને મોટું નુકસાન થતાં પ્રકૃતિ પ્રેમીઓમાં ભારે નારાજગી અને ચિંતા જોવા મળી રહી છે. દર વર્ષે ઉનાળામાં લાગતી આ ‘દવ’ની ઘટનાઓને રોકવા માટે કાયમી ઉકેલની માંગ ઉઠી રહી છે.
વનવિભાગ દ્વારા આગ પર કાબૂ મેળવવા કવાયત
ઘટનાની જાણ થતા જ દક્ષિણ વનવિભાગના ઉચ્ચ અધિકારીઓ સહિત વનકર્મીઓનો કાફલો ઘટનાસ્થળે દોડી ગયો છે. વનવિભાગની ટીમો દ્વારા પરંપરાગત પદ્ધતિઓ અને ફાયર બ્લોઅરની મદદથી આગને આગળ વધતી અટકાવવાના અને કાબૂમાં લેવાના યુદ્ધના ધોરણે પ્રયત્નો હાથ ધરવામાં આવ્યા છે. વનવિભાગ દ્વારા સ્થાનિક ગ્રામજનોની પણ મદદ લેવામાં આવી રહી છે જેથી આગ વધુ ઊંડા જંગલોમાં ન ફેલાય.