ગીર સોમનાથ જિલ્લામાં સ્થાનિક સ્વરાજની ચૂંટણીને લઈને રાજકીય ગરમાવો ચરમસીમાએ પહોંચ્યો છે. ઉમેદવારી ફોર્મ ભરવાના અંતિમ દિવસે પણ ભારતીય જનતા પાર્ટી અને કોંગ્રેસમાં ઉમેદવારોના નામોને લઈને ભારે ખેંચતાણ જોવા મળી રહી છે. ખાસ કરીને વેરાવળ નગરપાલિકાની યાદીમાં મડાગાંઠ સર્જાતા સવાર સુધી પણ સત્તાવાર જાહેરાત થઈ શકી નથી, જેને કારણે કાર્યકરોમાં ભારે રોષ અને અસમંજસની સ્થિતિ પ્રવર્તી રહી છે.
લોઢવા બેઠક પર વિવાદ
જિલ્લા પંચાયતની વાત કરીએ તો, ભાજપે 27 બેઠકો પર પોતાના ઉમેદવારો જાહેર કરી દીધા છે, પરંતુ હાઈપ્રોફાઈલ ગણાતી લોઢવા બેઠક પરનો વિવાદ હજુ શમવાનું નામ નથી લેતો. આંતરિક જૂથવાદ અને દાવેદારોના ભારે દબાણને કારણે પક્ષે આ બેઠક હાલમાં ‘હોલ્ડ’ પર રાખી છે. બીજી તરફ, કોંગ્રેસ પણ ભાજપના પત્તા ખૂલવાની રાહ જોઈ રહી હોય તેમ વેરાવળ નગરપાલિકા માટે પોતાની સત્તાવાર યાદી પેન્ડિંગ રાખી છે.
ફોર્મ ભરવાને લઈને અફરાતફરીનો માહોલ
વેરાવળમાં ટિકિટ ન મળતા કેટલાક જૂના જોગીઓ બળવો કરે તેવી શક્યતાને જોતા બંને પક્ષો ફૂંકી ફૂંકીને ડગલાં ભરી રહ્યા છે. મોડે સુધી નામો જાહેર ન થતા ઉમેદવારોમાં ફોર્મ ભરવાને લઈને અફરાતફરીનો માહોલ સર્જાયો છે. ગીર સોમનાથનું આ ‘ટિકિટ યુદ્ધ’ હવે કયા વળાંક લે છે તેના પર સૌની નજર છે.
આ પણ વાંચો— Gujarat Latest News Live : રાજ્યમાં ગરમીનું પ્રમાણ વધશે, ગરમ અને ભેજવાળી હવા ફૂંકાશે