ખેડા જિલ્લાના ઠાસરા અને સેવાલિયા સહિત ગળતેશ્વર તાલુકાના મોટાભાગના પેટ્રોલ પમ્પ પર આજે સ્ટોક ખલાસ થઈ જતાં ‘નો સ્ટોક’ના બોર્ડ લાગી ગયા છે. પેટ્રોલ ન મળવાને કારણે સ્થાનિક વાહનચાલકો અને મુસાફરો ભારે મુશ્કેલીમાં મુકાયા છે. ઠાસરા અને સેવાલિયામાં પેટ્રોલ ન મળતા વાહનચાલકો ડાકોર તરફ દોડ્યા હતા, જેના કારણે ડાકોરના પેટ્રોલ પમ્પ પર પણ વાહનોની લાંબી કતારો જોવા મળી રહી છે. ડાકોરમાં પણ સ્થિતિ એવી છે કે ગણતરીના સમયમાં જ ત્યાં પેટ્રોલનો જથ્થો પૂરો થઈ જાય તેવી શક્યતા છે.
કૃત્રિમ અછતનો ભય: કંપનીઓ દ્વારા ઓછો પુરવઠો
મળતી માહિતી મુજબ, પેટ્રોલ કંપનીઓ દ્વારા છેલ્લા કેટલાક સમયથી ત્રણ દિવસે માત્ર એક જ વાર પેટ્રોલનો જથ્થો ફાળવવામાં આવી રહ્યો છે. પૂરતા પ્રમાણમાં પુરવઠો ન મળવાને કારણે બજારમાં કૃત્રિમ અછત જેવી સ્થિતિ ઊભી થઈ છે. ખાસ કરીને ગ્રામીણ અને તાલુકા મથકોના પમ્પ પર જથ્થો ઝડપથી પૂરો થઈ જાય છે અને કંપનીઓ નવો સ્ટોક મોકલવામાં વિલંબ કરતી હોવાથી પમ્પો બંધ રાખવાની નોબત આવી છે.
યાત્રિકો અને વાહનચાલકોની હાલત કફોડી
ડાકોર જેવા ધાર્મિક સ્થળ નજીક હોવાથી મોટી સંખ્યામાં દર્શનાર્થે આવતા પ્રવાસીઓ અને પદયાત્રીઓ પણ આ અછતના કારણે અધવચ્ચે અટવાઈ પડ્યા છે. સેંકડો વાહનચાલકો પેટ્રોલ માટે એક પમ્પથી બીજા પમ્પ પર ભટકી રહ્યા છે, પરંતુ ક્યાંય સંતોષકારક જવાબ મળતો નથી. જો પેટ્રોલ કંપનીઓ દ્વારા તાત્કાલિક જથ્થો ફાળવવામાં નહીં આવે તો આગામી દિવસોમાં સમગ્ર જિલ્લામાં વાહનવ્યવહાર પર માઠી અસર પડવાની ભીતિ સેવાઈ રહી છે. સ્થાનિકોની માંગ છે કે તંત્ર આ મામલે દરમિયાનગીરી કરી ત્વરિત ઉકેલ લાવે.