પાટણ જિલ્લાની રાધનપુર નગરપાલિકા ફરી એકવાર વિવાદોના વમળમાં ફસાઈ છે. રાધનપુર નગરપાલિકામાં વિકાસ કામોના નામે મોટા પાયે આર્થિક ગેરરીતિ અને ભ્રષ્ટાચાર થતો હોવાના ગંભીર આક્ષેપો ઉઠતા સ્થાનિક રાજકારણમાં ભારે ખળભળાટ મચી ગયો છે. શહેરમાં સીસી રોડ અને ડામર રોડ બનાવવા માટે બહાર પાડવામાં આવેલા અંદાજે રૂપિયા 10 કરોડના ટેન્ડરોમાં માનીતી એજન્સીને જ કામ આપવા માટે આખી પ્રક્રિયામાં ગોબાચારી આચરવામાં આવી હોવાનો મામલો સામે આવ્યો છે.
નીચા ભાવ હોવા છતાં લાયક એજન્સીને વર્ક ઓર્ડર આપવામાં આવ્યો
મળતી વિગતો અનુસાર, રાધનપુર નગરપાલિકા દ્વારા રૂ. 6.22 કરોડ અને રૂ. 3.78 કરોડના રોડ-રસ્તાના બે મોટા પ્રોજેક્ટ માટે ટેન્ડર બહાર પાડવામાં આવ્યા હતા. સ્થાનિક અગ્રણી નવીનભાઈ મહેતાએ ચીફ ઓફિસર અને પાલિકાના એન્જિનિયર સામે ગંભીર આંગળી ચીંધતા જણાવ્યું છે કે, નિયમ મુજબ 9 ટકા નીચા ભાવ હોવા છતાં લાયક એજન્સીને વર્ક ઓર્ડર આપવામાં આવ્યો નથી.
માનીતાને લાભ આપવાના પ્રયાસ
તેની જગ્યાએ પોતાના વહાલા-દવલાની નીતિ અપનાવીને અધિકારીઓ દ્વારા પોતાની માનીતી એજન્સીને જ લાભ પહોંચાડવાના હવાતિયાં મારવામાં આવી રહ્યા છે.
ટેન્ડર 50 ટકા જેટલા ઊંચા ભાવે મંજૂર કરવાની પેરવી
નવીનભાઇનો આક્ષેપ તો ત્યાં સુધી છે કે, અગાઉ ત્રણ-ત્રણ વખત નિયમ વિરુદ્ધ જઈને ટેન્ડર રદ કરવામાં આવ્યા હતા અને હવે ચોથી વખત આ જ ટેન્ડર 50 ટકા જેટલા ઊંચા ભાવે મંજૂર કરવાની પેરવી ચાલી રહી છે. સામાન્ય સભામાં કોઈ પણ જાતની ચર્ચા કર્યા વગર જ નગરપાલિકાના સ્વભંડોળ પર અધધ 35 ટકા વધારાનું નાણાકીય ભારણ નાખવાનો કારસો ઘડાયો છે. અગાઉ સસ્પેન્ડ થઈ ચૂકેલા ચીફ ઓફિસર અને કારોબારી ચેરમેન પોતાના અંગત સ્વાર્થ માટે જનતાના ટેક્સના પૈસા વેડફી રહ્યા હોવાનો દાવો કરાયો છે. ખોટી રીતે ટેન્ડર પ્રક્રિયામાંથી બહાર ફેંકાયેલા પક્ષકારો હવે વહીવટી તંત્રના આ અન્યાય સામે ગુજરાત હાઈકોર્ટના દ્વાર ખખડાવવાની તૈયારી કરી રહ્યા છે. જો ભ્રષ્ટાચાર કરીને હલકી ગુણવત્તાનું કામ થશે તો ભવિષ્યમાં કરોડોના ખર્ચે બનનારા રસ્તાઓ ફરી બિસ્માર થઈ જશે તેવી લોકભીતિ પણ સેવાઈ રહી છે.
આ પણ વાંચો—- Trumpની ‘રેડ લાઇન’ સામે ઈરાન ઝૂકશે? 2 કલાક ચાલેલી હાઈ-વોલ્ટેજ બેઠક પણ અનિર્ણાયક