બનાસકાંઠા જિલ્લાની વાવ-થરાદ નગરપાલિકાની ચૂંટણીના જંગમાં મતદાન પહેલા જ મોટા સમાચાર સામે આવ્યા છે. વોર્ડ નંબર 6 માં ભાજપના ઉમેદવાર બિનહરીફ વિજેતા થયા છે. ફોર્મ ચકાસણી દરમિયાન કોંગ્રેસના ઉમેદવારનું ફોર્મ રદ ઠરતા ભાજપ માટે જીતનો રસ્તો સાફ થઈ ગયો હતો, જેના કારણે સ્થાનિક રાજકારણમાં ગરમાવો આવી ગયો છે.
કોંગ્રેસના ફોર્મમાં ટેકનિકલ ખામી
મળતી વિગતો અનુસાર, વોર્ડ નંબર 6 માંથી કોંગ્રેસ તરફથી સંતોકબેન મકવાણાએ ઉમેદવારી નોંધાવી હતી. જોકે, ચૂંટણી અધિકારી દ્વારા કરવામાં આવેલી ફોર્મ ચકાસણીની પ્રક્રિયામાં સંતોકબેન મકવાણાના ફોર્મમાં ગંભીર ખામીઓ જોવા મળી હતી. આ ટેકનિકલ ક્ષતિઓને કારણે ચૂંટણી અધિકારીએ તેમનું ફોર્મ રદ કરવાનો નિર્ણય લીધો હતો.
જશીબેન નાઈ બન્યા વિજેતા
કોંગ્રેસના ઉમેદવારનું ફોર્મ રદ થતા જ મેદાનમાં ભાજપના ઉમેદવાર જશીબેન નાઈ એકમાત્ર પ્રબળ ઉમેદવાર રહી ગયા હતા. અન્ય કોઈ હરીફ ન હોવાથી ચૂંટણી અધિકારીએ જશીબેન નાઈને બિનહરીફ વિજેતા જાહેર કર્યા છે. ચૂંટણીના સત્તાવાર મતદાન પહેલા જ ભાજપે એક બેઠક પર કબજો જમાવી લેતા કાર્યકરોમાં ભારે ઉત્સાહ જોવા મળી રહ્યો છે. બીજી તરફ, ફોર્મ રદ થતા કોંગ્રેસ છાવણીમાં સોપો પડી ગયો છે.