વિદેશ જવાના અને ત્યાં જઈને લાખો રૂપિયા કમાવવાના સપના જોતા યુવાનોને શિકાર બનાવતી વધુ એક આંતરરાજ્ય વિઝા ઠગ ગેંગનો પર્દાફાશ થયો છે. આ વખતે ઠગોએ સામાન્ય નાગરિકોને નહીં, પરંતુ વિઝા કન્સલ્ટિંગ ક્ષેત્રે કામ કરતી સુરતની એક મહિલા એજન્ટને જ પોતાની માયાજાળમાં ફસાવીને લાખો રૂપિયાનો ચૂનો લગાવ્યો છે. સોશિયલ મીડિયા પર યુકે (United Kingdom) અને કેનેડા (Canada) ની વર્ક પરમિટ વિઝા આપવાની જાહેરાત જોઈને આ આખી છેતરપિંડી આચરવામાં આવી છે.
જાહેરાત જોઈને સંપર્ક કર્યો અને છેતરાયા
મળતી વિગતો અનુસાર, સુરતની પીડિત મહિલા એજન્ટે સોશિયલ મીડિયા પ્લેટફોર્મ પર વિદેશની વર્ક પરમિટ સરળતાથી અપાવવાની એક આકર્ષક એડવર્ટાઇઝમેન્ટ જોઈ હતી. પોતે વિઝાના વ્યવસાય સાથે સંકળાયેલી હોવાથી, તેણે પોતાની પાસે આવેલા અન્ય ૧૮ સ્થાનિક યુવકોને વિદેશ મોકલવા માટે આ જાહેરાત આપનાર એજન્સીનો સંપર્ક કર્યો હતો. સામે પક્ષેથી વિઝા પ્રોસેસિંગ ફી અને દસ્તાવેજોના નામે અલગ-અલગ તબક્કે નાણાંની માગણી કરવામાં આવી હતી.
ખરાઈ કર્યા વિના ચૂકવ્યા 10.18 લાખ
મહિલા એજન્ટે સામેવાળી વ્યક્તિઓની ઓફિસ, લાયસન્સ કે વિઝાની અધિકૃતતાની કોઈપણ પ્રકારની ચોક્કસ ખરાઈ (વેરિફિકેશન) કર્યા વિના જ આંધળો વિશ્વાસ મૂકી દીધો હતો. તેણે તમામ ૧૮ યુવકો પાસેથી ફાઈલ ચાર્જ પેટે મેળવેલા કુલ રૂપિયા ૧૦,૧૮,૦૦૦ (દસ લાખ અઢાર હજાર) ઓનલાઇન ટ્રાન્સફર કરી દીધા હતા. નાણાં ચૂકવાઈ ગયા બાદ પણ જ્યારે લાંબા સમય સુધી વિઝા ન આવ્યા અને સામે પક્ષેથી ગોળ-ગોળ જવાબો મળવા લાગ્યા, ત્યારે મહિલાને પોતાની સાથે છેતરપિંડી થઈ હોવાનો અહેસાસ થયો હતો.