લીંબડી-અમદાવાદ નેશનલ હાઈવે પર આજે એક હૃદયદ્રાવક અકસ્માત સર્જાયો હતો. જાખણ ગામ નજીક મજૂરો ભરેલા ટ્રેક્ટર અને પૂરપાટ ઝડપે આવતા ડમ્પર વચ્ચે જોરદાર ટક્કર થઈ હતી. આ અકસ્માતમાં 15થી વધુ શ્રમિકો ગંભીર રીતે ઇજાગ્રસ્ત થયા છે, જ્યારે અકસ્માત સર્જીને ડમ્પર ચાલક વાહન મૂકી ફરાર થઈ ગયો હોવાનું જાણવા મળ્યું છે.
25થી વધુ મજૂરો સવાર હતા
પ્રાપ્ત વિગતો અનુસાર, એક સોલાર કંપનીમાં કામ કરતા આશરે 25થી વધુ મજૂરો ટ્રેક્ટરમાં સવાર થઈને જઈ રહ્યા હતા. આ દરમિયાન જાખણ પાસે ડમ્પરે ટ્રેક્ટરને જોરદાર ટક્કર મારતા અફરાતફરી મચી ગઈ હતી. અકસ્માત એટલો ભયાનક હતો કે એક મજૂરનો પગ ઘટનાસ્થળે જ કપાઈ ગયો હતો. રોડ પર ઈજાગ્રસ્તોની ચીસિયારીઓથી વાતાવરણ ગમગીન બની ગયું હતું.
108ની ટીમ તત્કાળ પહોંચી
ઘટનાની જાણ થતા જ લીંબડી, શિયાણી અને પાણશીણાથી ત્રણથી વધુ 108 એમ્બ્યુલન્સ તાત્કાલિક ઘટનાસ્થળે દોડી આવી હતી. ઇજાગ્રસ્તોને પ્રાથમિક સારવાર આપી નજીકની હોસ્પિટલ ખાતે ખસેડવામાં આવ્યા છે. અકસ્માતના પગલે હાઈવે પર ટ્રાફિક જામના દ્રશ્યો સર્જાયા હતા.પોલીસ કાફલાએ સ્થળ પર પહોંચી ટ્રાફિક હળવો કરાવ્યો હતો અને ફરાર ડમ્પર ચાલક વિરુદ્ધ ગુનો નોંધી તેને પકડવા ચક્રો ગતિમાન કર્યા છે.
